【 333飲食法 】韓國女星李遐怡瘦身秘技 唔使節食都可以減肥！

坊間減肥法越嚟越多，「168斷食法」、「422飲食法」，最近又有新嘅飲食法興起，就係「333飲食法」！唔少韓星都會用「 333飲食法 」嚟減肥，就連被譽為韓版Adele嘅歌手Lee Hi李遐怡都係靠呢個方法減肥，唔使捱餓仲可以食足三餐，想知道有幾Work就繼續碌落內文睇更多啦！

333飲食法：起身飲「3」杯水

第1個「3」係朝早起身先飲3杯水。飲完一杯清水，再飲一杯維他命C水溶性發泡錠同1杯美式咖啡。飲水用嚟補充瞓覺時消耗嘅水分，並幫助排除廢物及毒素，以啟動新陳代謝以幫助燃燒脂肪！維他命C則攝取所需維他命，增強免疫力，而美式咖啡可以去水腫同具有提神作用！ 1996年出生嘅李遐怡出道初期係一名有肉地嘅女仔，Baby Fat同粗壯嘅四肢，再加上只係157cm身高，睇落有啲圓潤～而依家嘅佢成功減磅，擁有纖細腰身原來只靠「333飲食法」，一齊睇下以下呢個方法有幾神奇啦！

333飲食法：定時食足「3」餐

第2個「3」係每日都食足3餐。唔少減肥方法都要透過節食去進行，「333飲食」就唔使要節食，可以喺唔使捱餓嘅情況下減肥！李遐怡指定時吃三餐，可以令胃腸道有規律地蠕動同休息，亦都唔使擔心節食後會因為太餓而暴飲暴食，佢通常會選擇高纖及高蛋白質嘅食物，如果兩餐之間覺得肚餓，仲可以用水果同蔬菜增加飽腹感～想跟住李遐怡一齊瘦身嘅朋友，可以參考佢嘅飲食餐單！

早餐：水煮蛋、青瓜、半個牛油果、一小條烤魚

午餐：清淡食物為主如蕃薯、椰菜花

下午茶：水果類如車厘子、小番茄

晚餐：雞胸肉沙律

333飲食法：每餐相隔「3」小時

第2個「3」係每一餐相隔3小時！李遐怡會盡量喺朝早10點食早餐，晏晝1點再食午餐，而晚餐則會喺4點食用，每日進食時間都會維持6小時內。呢個方法可以令進食時間更集中，又唔使捱餓，減肥瘦身話咁易！

除咗「333飲食法」，平時鍾意食朱古力嘅李遐怡都轉食生酮朱古力，相比起糖份極高嘅朱古力，生酮朱古力含無添加糖，碳水化合物含量亦相對較低，減肥人士都可以安心食啊！另外，運動嘅配合同樣重要，李遐怡平時會去跑步、踩單車等。不過每個人嘅體質唔同，減肥最緊要都係量力而為啊！