瘦底注意！食極唔肥點算好？五招「健康增肥」方法推薦

當每個人都話要減肥嘅時候，大家身邊有冇一位朋友無論食幾多嘢都唔肥？雖然唔少人好羨慕食極唔肥嘅人，但有冇諗過食極唔肥都好慘！今日等小編同大家分享下五招增肥方法，如果有瘦底嘅你哋想增肥不妨睇下以下呢啲方法！睇下有冇方法啱大家增重！

第一個方法：少食多餐

對于腸胃唔係好好嘅人，少食多餐反而係一個好好嘅方法增肥，身體可以更有效率吸收營養，就算胃口唔好嘅人都可以食更多嘅食物，但記得每天攝取嘅熱量都要足夠啊！

第二個方法：戒煙

最健康嘅增肥方法一定係戒煙，唔少戒煙人士分享為咗減低自己想食煙嘅諗法，會改為進食零食呢個方式，導致熱量攝取增加唔少！戒煙後仲可以令血液循環得到改善，腸胃消化同吸引都變得更好，體重就自然會節節上升啦！

第三個方法：重量訓練

運動唔係減肥嘅專利，就算想增肥都要做運動，對于體質偏瘦嘅人，最健康都係透過重量訓練改變體態，適當運動加上飲食來增加肌肉量，先有最有效嘅增肥方法！

第四個方法：增肥奶粉

增肥奶粉專為身材過于纖弱嘅人而設計嘅高蛋白質配方奶粉，能夠促進人體以健康同自然嘅方法去增加體重。近年唔少健身人士會飲嚟增肌，同時都係一個好好嘅方法增肥！飲完增肥奶粉，再配合適當嘅運動，增肥話咁易啦！

第五個方法：進食含豐富營養食物

增肥期間應該食咩好？營養豐富、較高卡路里嘅食物就啱曬大家，例如牛油果、堅果醬、黑朱古力、芝士同低纖維食物等。另外，建議大家每兩至三個鐘就要補充蛋白質同碳水化合物，瞓覺前食少少宵夜，只要每次宵夜嘅份量唔好過多就可以了。

以上方法只供參考，最緊要係搵到一個啱自己嘅增肥方法啊！